تاند (پنجشنبه، د حمل ۲۴ مه) په افغانستان کې د ملګروملتو مرستندوی ماموریت، یوناما نن فضا ته د انسان د ختو د نړیوالې ورځې په مناسبت په یوه پیغام کې ویلي چې پښتو د نړۍ څلورمه ژبه ده چې په فضا کې پرې خبرې وشوې.
له نن څخه ۶۳ کاله پخوا د اپریل په دوولسمه روسي ستورمزلی یوري ګاکارین لومړنی کس و چې فضا ته یې سفر وکړ.
یوناما وايي، دې سفر مرسته وکړه چې فضا ته د انسانانو لار پرانیستل شي.
عبدالاحد مومند لومړنی افغان و چې په ۱۹۸۸ م کال کې فضا ته لاړ او په فضايي تمځي کې یې ۹ ورځې تېرې کړې.
د ۱۹۶۱ کال د اپرېل په ۱۲ مه فضا ته د ګاګارین سفر د امریکا پر وړاندې سیالۍ کې د شوروي اتحاد لپاره یوه ستره بریا وه، او بېرته ځمکې ته راګرځېدل یې داسې بریالیتوب و چې سترګې پرې نشوې پټېدلی.
خو ګاګارین د تاریخ جوړولو لپاره داسې خطرناکې ننګونې ته ځان ورکړ چې خورا ډېره زړورتیا یې غوښته.
عبدالاحد مومند د ټول افغانستان ویاړ ، رښتینی اتل ، یو زړور انسان!