تاند ( جمعه، د حمل ۱۷ مه) راپورونه وایي، چې د فراه په پښتون کوټ ولسوالۍ کې نن د یوه جومات پر لمونځ کوونکو وسله والو کسانو ډزې کړې دي.
ویل شوي، چې په دغو ډزو ۳ تنه وژل شوی او یو شمېر نور ټپیان دي.
د یوه وژل شوي کس په اړه ویل شوي، چې حاجي محمد اکبر روفي نومیږي او د ګلبدین حکمتیار په مشرۍ د حزب اسلامي له پخوانیو کسانو دی.
د دغو ډزو انګېزه او لامل نه دی څرګند.
چارواکو په دې تړاو څه نه دي ویلي.
مخکې د جمعې او نورو لمونځونو پر مهال په جوماتونو کې ډېر ځله شیعه مذهبه افغانان په نښه کېدل او د پېښو مسوولیت داعش ډلې پر غاړه اخیست.