تاند (۵ شنبه، د حمل ۱۶ مه) د افغانستان لپاره د روسیې د ولسمشر ځانګړي استازي ضمیر کابلوف په یوه تازه مرکه کې تور پورې کړی، چې په افغانستان کې د داعش ډلې خراسان څانګه امریکا او برېتانیا، په افغانستان کې د خپل پوځي حضور پر مهال رامنځته کړې ده.
کابلوف په یوه تازه مرکه کې دا هم ویلي، چې داعش خراسان څانګې په افغانستان کې د امریکا او ناټو پوځي حضور نه و ننګولی، خو د طالبانو واکمن رژیم یې ننګولی.
د ده په وینا، طالبانو پر افغانستان له بیا واکمنیدو مخکې هم د داعش ډلې خلاف مبارزه کړې او هغه مهال امریکایان د داعش ډلې په خطر منکر وو او ټینګار یې کاوه، چې په دغه هېواد کې اصلي ګواښ داعش ډله نه؛ بلکې القاعده ده.
روسي استازي دا هم ویلي، چې د افغانستان په شمال کې اوس داعش وسله وال فعال دي.
د ده په خبره، په دغو وسله والو کې د ازبکستان، تاجکستان او د منځنۍ اسیا د یو شمېر نورو هېوادونو وسله وال فعال دي، چې هم د خپلو هېوادونو، هم ایران او هم روسیې خلاف ګواښیږي.
په کابل کې د طالبانو واکمن رژیم، امریکایي او برېتانوي چارواکو د کابلوف ادعاوو ته کوم غبرګون نه دی ښودلی.
تر هغه مخکې یو شمېر ایراني چارواکو او د سیمې نورو ځینو هېوادونو هم ورته څرګندونې لرلې.
طالب چارواکو بیا په افغانستان کې د داعش ډلې د پراخ او جدي موجودیت ادعاوې بې اساسه ګڼلې دي.
دا په داسې حال کې ده، چې له څه مودې راهیسې هم ایران او هم روسیه د یو شمېر خونړیو بریدونو شاهد وو، د دغو بریدونو مسوولیت داعش ډلې منلی و.