تاند- د فوربس مجلې د نړۍ د میلیاردرانو په کالني راپور کې د ۲۰۲۳ کال پرتله سږ کال د میلیاردرانو شمېر زیات شوی او له بلې خوا اوسني میلیاردران تر بل هر وخت زیات شتمن شوي دي.
د نویو میلیاردرانو په منځ کې، چې په دې لیست کې زیات شوي، د پاپ موسیقۍ د ستورې ټایلر سویفټ، د مصنوعي ذهانت د مخکښ شرکت (اوپن اي آی) رييس سام الټمن هم لیدل کېږي.
د فوربس پر اساس، اوس د تېر کال پرتله د نړۍ د میلیاردرانو په شمېر کې ۱۴۱ تنه نور ډېر شوي او ټولټال شمېر یې ۲۷۸۱ تنو ته رسیدلی دی.
د دوی ټولو شتمني د ۱۴ اعشاریه ۲ تریلیون ډالرو برابره ده چې د ۲۰۲۳ کال پرتله ۲ تریلیون ډالره ډېره شوې ده.
تر ټولو ډېر میلیاردران په امریکا کې دي چې شمېر یې ۸۱۳ ته رسیږي، په چین کې د میلیاردرانو شمېر ۴۷۳ او په هند کې ۲۰۰ دی چې دا د دواړو هیوادونو لپاره ریکارډونه ګڼل کېږي.
سږ کال تر ټولو ستر میلیاردر برنار ارنو او کورنۍ یې ده چې خالصه شتمني یې ۲۳۳ میلیارد ډالره ده.
ایلن مسک، چې د نړۍ تر ټولو ستر میلیاردر و، اوس یې خالصه شتمني ۱۹۵ میلیارد ډالره ده او د نړۍ دوهم ستر میلیاردر ګڼل کېږي.
د امازون بنسټګر جیف بیزوس د ۱۹۵ میلیارد ډالره شتمنۍ په لرلو درېیم ستر میلیاردر دی. د فیسبوک بنسټګر مارک زاکربرګ د ۱۷۷ میلیارد ډالره شتمنۍ په لرلو څلورم دی.