تاند (۴شنبه، د حمل ۱۵ مه) له افغان شخصیتونو سره د طالبانو د رژیم د تماس کمېسیون ویلي، چې دوه پخواني پولیس چارواکي د دوی په هڅو له بهرنیو هېوادونو څخه بېرته افغانستان ته ستانه شوي.
یاد شوي کمېسیون په خپله اېکس یا پخواني ټویټر پاڼه کې لیکلي، چې د پکتیا پخوانی امنیه قوماندان برید جنرال راز محمد مندوزی د دغه کمېسیون له لارې، له ترکیې څخه خپل هېواد ته راستون شو.
همدا شان ویل شوي، چې په کندوز کې د محلي پولیسو پخوانی عمومي آمر عبدالغفار مومند هم د افغان شخصیتونو سره د تماس کمېسیون له لارې، له ایران څخه خپل هېواد ته راستون شو.
طالب چارواکو مخکې د دغه کمېسیون له لارې هېواد ته د شاوخوا ۶ سوو پخوانیو دولتي منسوبینو د ستنېدو خبر ورکړی و.
د طالبانو منتقدان بیا د دوی دا کمېسیون نمایشي او له غیر طالب څېرو سره د طالب رژیم د تعامل لېوالتیا په نشت حساب ګڼي.
د دوی په باور، طالبانو په هېواد کې پاتې پخوانیو چارواکو او سیاسي څېرو له هغې ډلې: حامد کرزي، عبدالله عبدالله، ګلبدین حکمتیار او نورو سره هم ښه چلند ونه کړ او په سختو قیوداتو کې یې وساته، چې هېواد ته یې د بهر مېشتو افغان سیاسي څېرو ستنېدل ستونزمن کړل.