تاند (۴شنبه، د حمل ۱۵ مه) پاکستاني رسنیو خبر ورکړی، چې د دغه هېواد د سترې محکمې ۷ قاضیانو ته په یو ډول مرموزو پوډرو لړل شوي لیکونه استول شوي.
ویل شوي، چې دغه لیکونه د یوې نامعلومې ښځې او مېړه له لوري یې لیږل شوي، چې له پرانیستلو وروسته یې د قاضیانو سترګې او مخ سوی شروع کړی او ژر یې مخونه وینځلي.
معلومه نه ده، چې د دې پېښې تر شا څوک لاس لري، خو قاضیانو ویلي چې له دې امله یې پولیسو ته شکایت کړی او څېړنې پيل شوې دي.
تر دې مخکې، یادو قاضیانو د پاکستان له استخباراتي ادارې ای اېس آی څخه د دوی په چارو کې د لاسوهنې شکایت کړی و.
د پاکستان سترې محکمې د یاد شوي شکایت د ارزونې امر کړی و.
ویل کیږي، چې له تازه پېښې وروسته د یاد شوي شکایت ارزول هم ځنډیدلي دي.
د پاکستان پوځ او استخبارات د دغه هېواد د واک اصلي څښتن ګڼل کیږي او د پاکستان له جوړیدو تر ننه یې تل حکومتونه او بنسټونه په خپل کنټرول کې ساتلي او وخت پر وخت یې نسکور کړي دي.
په وروستیو کې د پاکستان د دغو اصلي واکدارانو خلاف څرګندونې پيل شوي، چې ځینې یې د دغه هېواد د ولسواکۍ په ګټه ګڼي.