د ترکیې په استانبول کې نن (سې شنبې) په یوه کلب کې د اور لګېدو له کبله لږترلږه ۲۹ تنه وژل شوي دي. ترکي رسنۍ وايي، د دې پېښې په خاطر د کلب د منېجر په شمول څو تنه نیول شوي او د پولیسو له لوري ورڅخه پوښتنې ګروېږنې روانې دي.
د استانبول د والي دفتر ویلي چې په اور کې، چې د کلب د ترمیم په ترڅ کې ولګېد، یو تن ټپي شوی او هغه روغتون ته بیول شوی دی.
کلب د اروپايي استانبول په بشیکتاش مېنه کې دی. دا کلب د یوې ۱۶ پوړیزې ودانۍ په لاندیني پوړ او تلخونه کې دی. دا پېښه وروسته له دې وشوه چې د ترکیې د ښاروالۍ په انتخاباتو کې د ولسمشر رجب طیب اردوغان ګوند ماته وکړه.
د استانبول ښاروال امام اوغلو له پېښې وروسته وویل چې یو پلاوی یې د دې ودانۍ د خوندیتوب په اړه ارزونې ته ټاکلی دی.
ده همداراز وویل چې اطفایې او طبي ډلو د پېښې ځای ته ډېر ژر ځان رسولی دی.
د امام اوغلو په وینا د کلوپ خاوند د ترمیم لپاره له اړوندو ادارو اجازه نه وه غوښتې.