تاند (دوشنبه، د حمل ۱۳ مه) د غزني د ګېرو ولسوالۍ په ځدراڼو کلي کې ماین چاودنې ۹ ماشومان وژلي.
د دې ولایت لپاره د طالبانو د ځایي چارواکو په یوه اعلامیه کې راغلي، چې دغه چاودنه د یکشنبې ورځې په ماسپښین شاوخوا درې نیمې بجې رامنځ ته شوې ده.
سرچینه زیاتوي: وژل شوي ماشومان ټول د ځدراڼو کلي اوسېدونکې وو چې پنځه تنه یې نجونې او څلور نور یې هلکان وو چې عمرونه یې له څلورو تر لسو کالو پورې وو.
طالب چارواکي وایي، دغه ماین د روسانو له وخته پاتې وو چې پر دغه ماشومانو یې چاودنه کړې ده.
دوی نه دي ویلي، چې دغه ماشومان ولې پر یاد شوي ماین برابر او د مرګ پېښې سره مخ شوي دي؟
د طالبانو له بیا واکمنیدو سره، په افغانستان کې اقتصادي او بشري ناورین شدید شوی، چې له امله یې په ډېرو سیمو کې ماشومان د زړو اوسپنو ټولولو او شاقه کارونو ته اړ وتي.
په دې ترڅ کې، ډېر ځله ماشومان پخوانیو ناچاوده توکو ته د کباړ په نوم پلورلو لپاره یې برابر شوي، چې د سختو مرګ ژوبلو سبب شوی یې دی.