تاند (شنبه، د حمل ۱۱ مه) د طالبانو تر واک لاندې د افغانستان ملي تلویزون خبر ورکړی، چې د طالبانو عمومي مشر ملا هبت الله اخوند زاده، د سوالګرو راټولولو او له سوالګرۍ څخه د مخنیوي لپاره د خپل رژیم جوړ کړی قانون تایید کړی.

سرچینه زیاتوي: دغه قانون درې څپرکي او ۲۷ مادې لري، چې دکورنیو چارو وزارت له نشه‌يي توکو سره د مبارزې معنیت په مشرۍ یو شمېر وزارتونو ته د سوالګرو راټولولو، درملنې او حرفوي زده‌کړو ورکولو دندې ورکړل شوې دي.

د کار او ټولنیزو چارو، عدلیې، اقتصاد، مالیې، پوهنې، عامې روغتیا، اطلاعاتو او کلتور، امربالمعروف او نهی عن‌المنکر، حج او اوقافو، او د شهیدانو او معلولینو وزارتونه او کابل ښاروالي، د زندانونو د سمون اداره، افغاني سره میاشت، د افغانستان سوادګري او پانګونې خونه او د چارو ادارې لوی ریاست ته دنده ورکړل شوې، چې د سوالګرو راټولولو، د بې‌وزلو او حرفوي سوالګرو تشخیص، له هغوی سره مرسته او د حرفوي او ښوونیزو زده‌کړو زمینه ورته برابره او درملنه یې وکړي.

بل لور ته: له نشه‌يي توکو سره د مبارزې دفتر رییس مل پاسوال حسیب‌الله احمدي وايي، چې د دوی رژیم تر دې دمه ۴۹ زره او ۶۴۱ سوالګر راټول شوي، چې له جملې یې ۱۴ زره ۹۳۲ مېرمنې، ۲۲ زره او ۷۲۵ نارینه، ۴ زره او ۶۵ یې نجونې دي، چې ۱۳ زره یې اړمن او پاتې نور یې حرفوي دي.

ملا هبت الله اخوند زاده مخکې د یوه فرمان په وسیله، د طالبانو د رئیس الوزرا اقتصادي مرستیال ملا عبدالغني برادر ته د یوې کمېټې په مشرۍ دنده سپارلې وه، چې په هېواد کې سوالګر له بازارونو ټول او مستحقو کسانو سره یې د مرستو زمینه برابره کړي.

طالب مشر دا قانون داسې مهال جوړ کړی او د عملي کېدو اعلان یې کړی، چې د ده له واک ته رسېدو سره افغانستان تر اوسه کوم اساسي قانون نه لري او د طالبانو منتقدان افغانستان د نړۍ یوازېنی بې قانونه هېواد ګڼي.

د طالبانو منتقدان، د دوی لخوا د قانون جوړونې بڼه هم نقدوي او وایي چې یوه ډله واک ته رسېدلي ملایان نه حق او نه مسلکي صلاحیت لري، چې د هرې برخې لپاره د قانون په نوم ځینې پرېکړې ترسره او پر خلکو وتپي.

طالب چارواکي بیا ادعا کوي، چې رژیم یې بې قانونه نه؛ بلکې د دوی په باور د « اسلامي شریعت» په رڼا کې خپلې چارې سمبالوي او د قوانینو پر جوړولو یې هم کار روان دی.