تاند (یکشنبه، د حمل ۵ مه) د پاکستان د بهرنیو چارو وزیر اسحاق ډار وايي، په افغانستان کې واکمن رژیم باید د پاکستان په خاوره کې د ټي ټي پي بریدونه، چې د ده په وینا د افغانستان له خاورې څخه کېږي، وغندي.

ښاغلي ډار دا خبره پرون (شنبې) په بروکسل کې د اتومي انرژۍ په غونډه کې له ګډونه وروسته په یوه خبري غونډه کې وکړه.

ده د تېرې اوونۍ د دوشنبې په سهار وختي د افغانستان په خوست او پکتیکا ولایتونو کې د پاکستان د هوايي ځواک د بمبارۍ دفاع وکړه، ویې ویل: پاکستان د افغانستان په خاوره کې د استخباراتي معلوماتو پر اساس د ترهګرو پر پناهځایونو عملیات وکړل.

دا په داسي حال کې ده چې د طالبانو حکومت ویلي چې د پاکستان په بمبارۍ کې د ۳ ماشومانو او ۵ ښځو په ګډون ۸ تنه ملکیان وژل شوي دي.

د پاکستان د بمبارۍ په غبرګون کې طالبانو د پکتیا د ډنډوپټان او کورمې ترمنځ د ډیورند کرښې په اوږدو کې د پاکستاني ځواکونو پر پوستو د سپکو او درنو وسلو ډزې وکړې.

د دوو هیوادونو ترمنځ په اړیکو کې دا ترینګلتیا وروسته له دې زیاته شوه چې د شمالي وزیرستان په میرعلي کې د پاکستان د پوځ پر یوه مرکز په برید کې د دوو صاحب منصبانو په ګډون ۷ پوځیان ووژل شول او ګڼ نور ټپیان شول.

ټي ټي پي د دې برید مسوولیت ومانه.

د پاکستان د باندنیو چارو وزیر وویل چې په پاکستان کې وروستي بریدونه د ټي ټي پی له لوري کیږي چې په افغانستان کې پناهځایونه لري، له همدې کبله د طالبانو حکومت باید دا بریدونه وغندي.

طالبانو تراوسه پورې د اسحاق ډار د دې څرګندونو په ځواب کې څه نه دي ویلي خو تر دې مخکې یې په افغانستان کې د ټي ټي پي د پټنځایونو د شتون په اړه د پاکستان تورونه په ځلونو رد کړي او له پاکستان څخه یې غوښتي چې خپلې ستونزې په خپل هیواد کې دننه په خپله حل کړي.