تاند (پنجشنبه، د حوت ۲۴ مه) په ننګرهار کې د طالبانو د رژیم چارواکو ویلي، چې پاکستان د تورخم دروازې له لارې افغان ناروغ لرونکو ته بیرته د ځانګړي ټوکن په وسیله دغه هېواد ته د درملنې لپاره د تلو اجازه ورکړه.
افغان ناروغ لرونکو ته د دغه سفر ممانعت له څلور ورځو راهیسې پيل شوی و.
ځایي خلکو او ناروغ لرونکو په دې کار خوښي ښودلې.
معلومه نه ده، چې پاکستان ولې دغه محدودیت وضع کړی و او ولې یې بیرته لیرې کړی دی؟
تازه، د کندهار لپاره د طالبانو د والي ملا شیرین اخوند دفتر ویلي، چې په کابل کې د پاکستان شارژدافیر عبید الرحمان نظاماني دغه ولایت ته تللی او ملا شیرین سره یې پر دوه اړخیزو اړیکو خبرې کړي.
پاکستان تل تورن شوی، چې د افغانستان واکمنو سره د خپلو ناندریزو اړیکو لپاره پر عامو خلکو فشارونه راوړي او غچ یې له دوی څخه اخلي.
د دې ترڅنګ، د طالبانو د رژیم پر هغه کمیسیون هم وخت پر وخت د فساد او سلیقوي چلند تورونه پورې کیږي، چې پاکستان ته د تګ لپاره د ناروغانو او پایوازانو په نوم یې د سفر ځانګړي ټوکنونه وېشي.
طالب چارواکي بیا په دې برخه کې ناغیړي او فساد بې اساسه تور ګڼي.