تاند (۵ شنبه،د حوت ۱۷ مه) د طالبانو د رژیم ویاند ذبیح الله مجاهد هغه راپورونه تایید کړل، چې ایران ته د کمال خان اوبو ور خوشې شوې دي.
نوموړي ویلي: د وروستیو ورښتونو له امله د کمال خان بند کاسه ډکه شوې او د ایران حقابه یې هم ور خوشې کړې ده.
طالب ویاند زیاته کړه:«زموږ هڅې روانې دي چې، په افغانستان کې اوبیزې زېرمې ډکې شي او هغه ژمنې چې له ایران سره یې لرو هم په پام کې ونیسو. د اوبو خوشې کول هم سم دي.»
مخکې ایراني چارواکو د هلمند سېند له اوبو د دوی د برخې د نه خوشې کېدو ادعاوې او شکایتونه کړي وو، چې طالب چارواکو یې دلیل په هلمند سېند کې د اوبو کموالی او افغانستان کې پراخه وچکالي ګڼلې وه.
د ایران ولسمشر ابراهیم رییسي یو ځل په توندو ټکیو له طالب واکمنو د اوبو ور پرېښودو غوښتنه کړې وه، خو طالب چارواکو د هلمند سېند د تړون له مخې د اوبو د موجودیت په صورت کې ایران ته د حقابې ورکولو خبره کړې وه.