تاند (جمعه، د حوت ۱۱ مه) د افغانستان لپاره د بریتانیا د سفارت شارژدافېر وايي چې د ملګروملتو د امنیت شورا د ۲۷۲۱ نمبر پرېکړه لیک او د افغانانو د ژوند د ښېګڼې لپاره د خپلواکې ارزونې ملاتړ کوي.
رابرت ډیکسن نن (جمعه) پر خپله ایکسپاڼه لیکلي، په دې اړه یې په کابل کې له طالب چارواکو سره خبرې کړي او له هغوی سره د پرمختګ پر ممکنو لارو غږېدلی دی.
دیکسن همداراز په کابل کې د مدني ټولنې له یو شمېر فعالانو او ښځو سره په افغانستان کې د هغوی د اوسني ژوند په اړه خبرې کړي دي.
په افغانستان کې د بریتانیا د سفارت شارژدافېر د هغه پرېکړه لیک ملاتړ کړی چې د افغانستان لپاره د ځانګړي استازي د ګومارل کېدو غوښتنه پکې شوې ده.
د طالبانو حکومت د ملګروملتو له لوري د افغانستان لپاره د ځانګړي استازي له ټاکل کېدو سره مخالفت کړی دی.