تاند (چهارشنبه، د حوت ۹ مه) د بلوچستان په پنجګور او بولان سیمو کې د بلوچ بیلتون غوښتونکو په بریدونو کې لږترلږه ۶ پاکستاني پوځیان وژل شوي دي.

د بلوچستان د ازادۍ پوځ (BLA) نن ادعا وکړه چې د دوی وسله والو دا بریدونه په بولان او پنجګور کې د پاکستاني پوځیانو د عملیاتو په ځواب کې وکړل.

دا بیلتون غوښتونکی ځواک وايي چې د پاکستان پوځ له تېرو اوو ورځو راهیسي په بولان او پنجګور سیمو کې د دوی په وینا پوځي یرغلونه پیل کړي چې په نتیجه کې یې د عامو خلکو پر کورونو د هاوان ګولۍ لګېدلي دي.

د بلوچستان د ازادۍ پوځ همداراز وايي چې د پاکستان پوځ، چې دوی یې غاصب ځواک بولي، ښځې او ماشومان د انساني ډال په توګه کارولي دي.

د بلوچستان د ازادۍ پوځ په وینا، وسله والو یې له اتومات سپکو او درنو وسلو څخه په کار اخیستو نه یوازې د خپل دښمن ۶ پوځیان وژلي بلکې ګڼ نور یې ټپیان کړي دي.

بلوچستان له ډیرو کلونو راهیسي نارام دی. په دې ایالت کې بلوچ بیلتون غوښتونکي هر څه موده وروسته د پوځ پر مرکزونو بریدونه کوي خو د دوی بریدونه او په پایله کې یې د مرګ ژوبلو راپورونه په سیمه کې د خبریالانو د نه شتون له کبله تایید یا رد کېدای نه شي.