تاند (دو شنبه، د حوت ۷ مه) د پاکستان تر واک لاندې د بلوچستان د چمن سیمې اعتراض کوونکو له ۵ میاشتني ځنډ وروسته د سپين بولدک-چمن لاره د سوداګريزو توکو د لېږد رالېږد پر مخ پرانیسته.
د چمن د پرلت کوونکو ویاند صادق اڅکزی وايي چې دا پرېکړه د روژې د میاشتې را رسېدو له امله شوې ده.
اڅکزی زیاتوي: “موږ دا پرېکړه ځکه وکړه چې روژه را روانه ده، خو زموږ پرلت روان دی، موږ د هر ډول ټرانسپورټ، کانټینرونو، وارداتو او صادراتو لپاره لارې خلاصې کړې، ټولو ته اجازه ورکړل شوه.”
په چمن کې روان پرلت د تېر ۲۰۲۳م کال د اکټوبر له ۱۲مې نېټې راهیسې دوام لري چې زرګونه کسانو پهکې ګډون کړی او دوی د پاکستان له حکومته غواړي چې د کرښې دواړو غاړو ته د اوسېدونکو لپاره د پاسپورټ او وېزې لرلو شرط لغوه کړي.
پرلت کوونکو د خپلو اعتراضونو په ترڅ کې د چمن-سپين بولدک دروازه هم د هر ډول ترافيکو پر مخ تړلې وه.
پاکستاني چارواکو ټینګار کړی، چې پر ډیورنډ کرښه د تګ راتګ لپاره به د پاسپورټ او ویزې د جبري کولو له پرېکړې په شا نه شي.
په کابل کې د طالبانو د رژیم د بهرنیو چارو وزارت سیاسي مرستیال عباس ستانکزي هم ویلي، چې دوی د ډیورنډ فرضي کرښې په ګډون پر دې کرښې د تګ راتګ لپاره د پاسپورټ او ویزې د جبري کولو خلاف دي.