تاند (دوشنبې، ددلوې ۹ مه) ټاکل شوې ده چې نن (دوشنبې) په کابل کې «د افغانستان د سیمه ییزې همکارۍ نوښت» په نوم کنفرانس جوړ شي.
په دې کنفرانس کې، چې د طالبانو حکومت یې کوربه دی، د روسیې، چین، ایران او پاکستان استازي ګډون کوي.
د طالبانو د باندنیو چارو وزارت په یوه خبرپاڼه کې ویلي چې د سیمې او ګاونډ هیوادونو سفیران او ځانګړي استازي به په دې کنفرانس کې برخه واخلي.
د خبرپاڼې پر اساس، په دې کنفرانس کې به د افغانستان او د سیمې د هیوادونو ترمنځ د سیمه ییزو همکاریو د پراختیا په اړه خبرې وشي.
د ایران او روسیې استازو څو ورځې وړاندې د کابل په غونډه کې ګډون ته چمتووالی اعلان کړی وو.
له دې جلا په پام کې ده چې د روانې میاشتې په اتلسمه او نولسمه په دوحه کې د ملګروملتو تر مشرۍ لاندې د افغانستان په اړه یو کنفرانس جوړ شي.
د ملګروملتو د سرمنشي ویندوی سټیفن دوجاریک د دې کنفرانس په اړه ویلي، دا غونډه د ملګروملتو د سرمنشي په بلنه د هیوادونو او سیمه ییزو سازمانونو د ځانګړو استازو په ګډون جوړېږي او د ملګروملتو د ځانګړي څېړونکي فریدون سینیراوغلو سپارښتنو ته په کتو د افغانستان په اړه د نړیوالو د نظرونو همږغي ارزوي.
د دوحې په غونډه کې طالبانو او نورو افغان سیستوالو ته هم د ګډون بلنه ورکړل شوې ده.
ویل کېږي چې د افغانستان لپاره د ملګروملتو د ځانګړي استازي د ګومارلو او د افغانستان لپاره د تماس د یوې ډلې د جوړېدو موضوع به د دوحې په غونډه کې وڅېړل شي.