تاند (چارشنبه، د جدي ۲۷ مه) په اسلام اباد کې د طالبانو د رژیم سفیر سردار احمد شکېب وایي، چې د پاکستان د حکومت او د دغه هېواد د طالبانو ترمنځ د مذاکراتو کوربه توب په دې مانا نه ده، چې ګواکې کابل پاکستاني طالبانو ته رېښتیا هم پناه ورکړې ده.
نوموړي په یوه تازه مرکه کې د دې ترڅنګ زیاته کړه، چې د کابل واکمنو طالبانو له افغان خاورې د پاکستان د اندېښنو په اړه لازم ګامونه اخیستي.
د هغه په وینا، قطر هم د افغانستان د واکمنو طالبانو او امریکا تر منځ د خبرو منځګړتوب کړی، خو دا په دې مانا نه وه چې ګواکې قطر د دوی ملاتړی او پناه ورکوونکی و.
د طالبانو سفیر ټینګار کړی، چې د دوی رژیم د پاکستان په ګډون له ټولو ګاونډیو هېوادونو سره ښې اړیکې غواړي.
پاکستان بیا- بیا افغان طالبان تورنوي چې پاکستانیو طالبانو ته یې پناه ورکړې او د پاکستان خلاف د بریدونو ملاتړ یې کوي.
د طالبانو رژیم بیا دا ادعاوې بې اساسه بولي.