تاند (یکشنبه، د جدې ۲۴ مه) د طالبانو د کورنیو چارو وزارت ویاند عبدالمتین قانع په نیمروز ولایت مقام کې د ننني ځانمرګي برید په اړه معلومات ورکړي.
نوموړي په خپله ایکس پاڼه کې لیکلي: نن غرمه د نیمروز ولایت مقام مخته یو ځانمرګی بریدګر هغه مهال د امنیتي ځواکونو له خوا په ډزو ووژل شو چې د ولایت ودانۍ ته یې د ننوتلو هڅه کوله، د یادولو ده چې د بریدګر پر تن د چاودېدونکو توکو د انفجار له امله دری تنه مجاهدین ټپیان شوي دي.
د دغه برید مسوولیت کومې ډلې پر غاړه نه دی اخیستی.
د طالبانو د استخباراتو یوه مطبوعاتي مسوول جواد څارګر بیا د نیمروز لپاره د طالبانو د والي شېخ محمد قاسم خالد عکس خپور کړی او ویلي، چې هغه روغ رمټ دی.
شېخ خالد د طالبانو د عمومي مشر ملا هبت الله له تر ټولو نیږدې کسانو څخه ګڼل کیږي، چې ډېر ځله د داعش ډلې خلاف په توندو ټکیو غږیږي.