تاند (یکشنبه، د جدې ۲۴ مه) د طالبانو د بین الوزارتي کمېټې په ناسته کې، د مس عینک کان د استخراج د عملي کار پر پیل ټینګار شوی دی.
باختر آژانس لیکلي، په دې ناسته کې چې د کانونو او پټرولیم وزارت سرپرست شیخ شهاب الدین دلاور او نورو یو شمېر اړوندو چارواکو ګدون درلود؛ شېخ دلاور د یادې پروژې پر ارزښت خبرې کړي او د مس عینک کان د استخراج د عملي کار پر پیل یې ټینګار کړی دی.
په ورته وخت کې، د مس عینک کان قراردادي مسئولینو د پروژې د عملي کار د پیل ژمنه کړې او ویلي يې دي: «زموږ شرکت په خپلو ژمنو ولاړ دی او ژر به د یادې پروژې عملي کار پیل کړو».
د مس عینک کان د هېواد په کچه له لویو او مهمو کانونو څخه دی چې د طالب چارواکو په وینا، د عملي کار په پیل سره به یې زیات شمېر هېوادوالو ته د کار زمینه برابره شي او د هېواد په پرمختګ او ځان بسیاینې کې به مهم رول ولوبوي.
د ډبرو سکاره خو د پنجابیانو روزي شوه ، اوس نوبت د لوګر د عینک د مسو کان دی . سرپرست حکومت او دومره صلاحیت ؟