تاند (یکشنبه، د جدې ۲۴ مه) راپورونه وايي چې طالبانو لږترلږه ۱۵ تنه د حزب التحریر د غړیتوب په تور په تخار ولایت کې نیولي دي.
د ایران تسنیم خبري اژانس په تالقان ښار کې د یوې سرچینې په قول نن خبر ورکړ چې دا کسان په یوه کور کې نیول شوي دي.
د خبر پر اساس، له نیول شویو کسانو سره د حزب التحریر تبلیغاتي پاڼې موندل شوي دي.
نیول شوي کسان په تالقان کې د استخباراتو ریاست ته بیول شوي دي.
طالبانو تراوسه پورې په دې اړه رسماً څه نه دي ویلي خو تر دې وړاندې یې تېره میاشت په بدخشان ولایت کې لسګونه کسان د حزب التحریر د غړیتوب په تور نیولي وو.
تېر کال د افغانستان ځینو رسنیو ویلي و چې په دې هیواد کې د حزب التحریر پر فعالیتونو بندیز لګول شوی دی.
دا ډله، داعش ته ورته افکار لري خو پوځي فعالیت نه کوي.