تاند (یکشنبه، د جدې ۱۷ مه) د کابل د پولیسو ویندوی خالد ځدراڼ وايي چې د کابل په پرونۍ چاودنې کې د وژل شویو کسانو شمېر ۵ ته رسیدلی دی.
د فرانس پریس خبري اژانس د راپور له مخې، ځدراڼ نن همداراز وویل چې په دې پېښه کې، چې تېر ماښام د کابل په دشت برچي سیمه کې وشوه، ۱۵ نور ژوبل شوي دي.
پرون خالد ځدراڼ ویلي و چې دشت برچي ته د سپرلیو په روان کاسټر موټر کې د چاودنې په نتیجه کې ۱۶ تنو ته مرګ ژوبله اوښتې چې د هغو په منځ کې ۲ تنه وژل شوي او نور ټپیان دي.
په افغانستان کې د ملګروملتو مرستندوی ماموریت دا برید غندلی او د هغه د عاملانو د نیولو او ورته سزا ورکولو غوښتنه کړې ده.