تاند (پنجشنبه، د جدي ۷مه) د افغانستان د راتلونکي فکري مجمع په نوم یوې ډلې دا ځل په ترکیه کې د دغه هېواد په تړاو غونډه کړې.
یاده غونډه د دوحې د یوې فکر خونې له لوري د یوې پيل کړې لړۍ اتمه غونډه ګڼل شوې ده.
د دوحې د انسټېټیوټ د شخړو او بشري مطالعاتو د مرکز رییس سلطان برکات ویلي چې په دې غونډه کې د افغانستان لپاره د ملګرو ملتونو ځانګړي همغږي کوونکي فریدون سینرلي اوغلو، ښځینه سیاستوالې فاطمه ګیلاني او یو شمېر نورو څېرو ګډون کړی و.
د غونډې د نورو ګډونوالو نومونه نه دي رسنیز شوي.
د یادو غونډو سمبالګر سلطان برکات تورن دی چې د هېواد په اشاره یې د طالبانو لپاره د ملاتړ جذبولو هڅې کوي.
د غونډو د دې لړۍ په مخکینیو یو شمېر ناستو کې د طالبانو ځینو مخالفو څېرو هم ګډون کړی و او دا ډول غونډې یې د افغانستان په اړه له سیاسي مسایلو ور اخوا د فکري تبادلې لپاره ګټورې ګڼلې وې.
د طالبانو د رژیم ویاند ذبیح الله مجاهد بیا ویلي چې دا غونډې د دوی د ملاتړ په محوریت ګټورې تمامیدای شي.