تاند (پنجشنبه، د جدي ۷مه) د افغانستان بانک لپاره د طالبانو عمومي رئیس ملا هدایت الله بدري وايي چې خلک په بانکونو کې له خپلو شخصي حسابونو نور په میاشت کې تر ۳ زرو امریکایي ډالرو پورې ایستلی شي.
نوموړي د یوې خبري ناستې پر مهال ویلي، له دې وروسته د بانکي حسابلرونکي کولای شي، په میاشت کې تر ۳۰۰۰ ډالره او د افغانیو په حساب ۲۵۰زره له بانکونو ترلاسه کړي.
د ملا بدري د معلوماتو له مخې، افغانستان بانک د بازار اړتیا ته په کتو نوي افغاني بانکنوټونه وېشي او زاړه هغه راټولوي.
بدري ادعا وکړه چې د افغانستان بانک توانېدلی د معقولو پولي سياستونو په پلي کولو سره د افغانۍ ارزښت وساتي او د ثبات لور ته یې بوځي.
د افغانستان بانک د سرپرست په وینا، په نړيواله کچه افغانۍ د غوره ثبات لرونکو پولي واحدونو په کتار کې ده او ارزښت يې لوړ شوی دی.
نوموړي دغه راز د نویو افغاني بانکنوټونو چاپ د طالبانو د رژیم لاسته راوړنه وبلله او ویې ویل چې بانکي سکتور ښه پر مخ روان دی.
دا څرګندونې په داسې حال کې دي چې د طالب واکمنۍ پر مهال د افغاني بانکنوټونو د چاپ اعلان په لومړي ځل د افغانستان لپاره د متحدو ایالتونو استازي ټام ویسټ کړی و.
هغه په دې اړه نور جزییات نه وو ورکړي، خو ویلي یې وو چې دا پیسې د دوی په مرسته چاپ شوې دي.
له دې سره، د بانکونو زیات مراجعین د طالب چارواکو د ادعاوو برعکس د پیسو په ترلاسه کولو کې له ګڼو ستونزو شکایت کوي او وايي په دې سوړ ژمي کې ساعتونه- ساعتونه د خپلو معاشونو او پیسو د ترلاسه کولو لپاره پر سړکونو د بانکونو مخې ته منتظر وي، خو پیسې په سختۍ ترلاسه کوي.