تاند (چارشنبه، د جدي شپږمه) د طالبانو رژیم نن په کابل کې د خپلو لوړپوړو چارواکو په ګډون پر افغانستان د پخواني شوروي اتحاد د یرغل د ۴۴ کلیزې د غندنې لپاره غونډه جوړه کړې وه.
په دې غونډه کې د طالبانو د رئیس الوزرا اداري او سیاسي مرستیالانو او ګڼو چارواکو ګډون درلود.
د دغې غونډې ویناوالو پخوانی شوروي اتحاد د یاد شوي یرغل له امله وغانده او هم یې امریکا پر افغانستان په یرغل کولو تورنه او وتل یې خپله لاسته راوړنه وبلله.
دوی دغه راز ادعا لرله چې د جمهوري نظام له سقوط وروسته یې د دوی په وینا« بشپړ اسلامي نظام» حاکم کړی.
طالب چارواکو پرته له دې چې د خپل رژیم د ننګونو یادونه وکړي، د خپلو وروستیو ویناوو په دوام له خلکو وغوښتل چې د رژیم په بقا او ساتنه کې یې مرسته وکړي.
د طالبانو د کورنیو چارو وزیر سراج الدین حقاني له ګاونډیو هېوادونو څخه د افغان کډوالو په زوره ایستو ته په اشارې وویل چې دا هڅې د دوی رژیم ته د ګواښ جوړولو لپاره کیږي.
هغه دغه راز وویل چې د دوی له بیا واک ته رسیدو سره یې د دندې شوق نه و، خو د خلکو د ستونزو لپاره یې دنده پر غاړه اخیستې ده.
د طالبانو د رئیس الوزرا سیاسي مرستیال مولوي کبیر ادعا وکړه چې د شوروي لښکرو خلاف جنګیدونکې ډلې ځکه د شورویانو له وتو وروسته ناکام شول چې د قدرت په سر یې خپلمنځي ناندرۍ لرلې.
هغه څه چې د ده په وینا، دوی یې نه لري او د قدرت شوق ورسره نشته.
یادې څرګندونې په داسې مهال دي چې د افغانستان له اداري نظام څخه هره ورځ د غیر طالب منسوبینو د ګوښه کېدو او پر ځای یې د نا مسلکي ملایانو او طالبانو د ګومارنې خبرونه ورکول کیږي او خلک په سراسري ډول طالبان د قدرت په انحصار او د افغانستان د اداري نظام په پاشلو تورنوي.