تاند (جمعه، د جدي ۱ مه) طالبان چې په ټوله نړۍ کې د تجونو د زده کړو د مخنیوي په خاطر غندل کېږي او له دې کبله یې رژیم په نړۍ کې منفور دی، وايي چې نجونو ته که په هر عمر کې وي، د مدرسې اجازه شته.

اسوشیتید پریس خبري اژانس وايي چې د پنجشنبې په ورځ د طالبانو د پوهنې وزارت ویندوی منصور احمد ورته وویل چې د حکومت تر کنټرول لاندې مدرسو کې پر نجونو هیڅ راز بندیز نه شته، که په هر عمر کې وي، مدرسې ته تللی شي. خو یوازې دا شرط شته چې د مدرسې درسونه د نجونو له عمر سره متناسب وي.

«که د یوې نجلۍ عمر له ټولګي سره متناسب نه وي، یعني عمر یې ډېر زیات وي، بیا اجازه نه ورکول کېږي.»

ده دا هم وویل چې په خصوصي دیني مدرسو کې هم د نجونو عمر په پام کې نه نیول کېږي، هم پېغلې او هم مېرمنې کولی شي مدرسو ته لاړې شي.

د اسوشیتید پریس پر اساس، په افغانستان کې اوس شاوخوا ۲۰ زره مدرسې شته چې ۱۳ زره ۵۰۰ یې د حکومت تر کنټرول لاندې دي.

احمد وايي چې خصوصي یا ناحکومتي مدرسې په جوماتونو یا کورونو کې فعالیت کوي.

اسوشیتید پریس وايي چې احمد په دې اړه معلومات ورنه کړل چې اوس په افغانستان کې څومره نجونې په مدرسو کې درس وايي او ایا پر ښوونځیو د طالبانو له بندیزه وروسته په مدرسو کې د ښځینه زده کوونکو شمېر زیات شوی او که نه دی.