تاند (جمعه ، د جدي لومړۍ) د طالبانو د رئیس الوزرا اقتصادي مرستیال ملا عبدالغني برادر ټینګار کوي چې افغانستان باید په کور دننه د برېښنا تولید زیات او له دې اړخه پر ځان بسیا شي.
ښاغلي برادر پرون د شبرغان – ارغندي د ۵۰۰ کیلو ولټ برېښنا د لېږد پروژې د پاتې کار د پیل په مراسمو کې برېښنا د افغانستان یوه جدي اړتیا وبلله او ویې ویل، د دوی رژیم له پانګوالو غوښتي چې په دې برخه کې پانګونه وکړي.
هغه زياته کړه، چې د دې پروژې په بشپړېدو سره به د ترکمنستان برېښنا کابل ته ولېږدول شي او له هغه ځايه به سوېلي ولايتونو ته وغځول شي.
د برېښنا شرکت د مسوولینو د معلوماتو له مخې، د دې پروژې په بشپړېدو سره به شپږ میلیونه کورنۍ له برېښنا برخمنې شي.
د دوی په خبره، د شبرغان – ارغندي د ۵۰۰ کیلو ولټ برېښنا مزي په غځولو سره به ۱۰۰۰ میګاواټه برېښنا له ترکمنستان څخه په مناسبه بیه وارد شي.
طالب او د پرځېدلي جمهوري نظام چارواکو بیا- بیا ورته څرګندونې کړي، خو خلک یې خبرې تر ډېره تشریفاتي بولي او وایي عملي برخه یې په نشت حساب ده.
د افغانستان نږدې ټوله برېښنا دا اوس هم له ګاونډیو هېوادونو واردیږي او مصرفیږي چې هم د خلکو اړتیاوې نه شی ځوابولی او هم په ډېره ګرانه تمامیږي.
دا په داسې حال کې ده چې افغانستان د اوبو، لمر او ډبرو سکرو له پلوه چې د برېښنا د تولید مهمې سرچینې دي، یو بډای هېواد دی.