تاند (پنجشنبه، د قوس ۳۰) په ملګروملتو کې د پاکستان استازي د امنیت شورا په غونډه کې ادعا وکړه چې د افغانستان د طالبانو حکومت د تروریستي ډلو ښکاره ملاتړ کوي.

منیر اکرم وویل، په افغانستان کې دېره ترهګرې ډلې د پاکستان، سیمې او نړۍ لپاره خطر پېښوي.

ده په افغانستان کې د طالبانو رژیم د پاکستاني طالبانو یا ټي ټي پي او په دې تحریک پورې د تړلیو ډلو په ملاتړ تورن کړ.

ده د افغانستان له خاورې د پاکستان خلاف د ټي ټي پي ګواښ جدي وباله او ویې ویل، د دې لپاره چې ټي ټي پي د لوېدیځ پرمختللې وسلې ترلاسه کړي د دې ډلې بریدونه د پخوا پرتله پېچلې اوخطرناکې شوي دي.

پاکستان تر دې وړاندې هم ادعا کړې وه چې ټي ټي پي ته د امریکا پرمختللې لیزري وسلې په لاس ورغلي دي خو امریکا دا ادعا رد کړه او ویې ویل چې په افغانستان کې یې داسې وسلې نه دي پرې ایښي.

د پاکستان استازي وویل، د دې لپاره چې د افغانستان د طالبانو رژیم محبور کړل شي چې د تروریستي ډلو خلاف جدي اقدام وکړي پر افغانستان دې د بندیزونو د څارنې د کمېټې کار پیاوړی شي.

په ملګروملتو کې د پاکستان استازي دا هم وویل چې د طالبانو له حکومت سره هر راز تعامل باید د تروریستي ډلو پر ضد خلاف د دوی د اقدام پر اساس وي.

خو د افغانستان لپاره د ملګروملتو ځانګړې استازې روزوا اتونبایوا بیا وویل چې له طالبانو سره تعامل او خبرې پکار دي ځکه چې خبرې هغوی ته مشروعیت نه ورکوي مګر له دې لارې هغوی د نجونو او ښځو د حقونو ورکولو ته تشویق کېدای شي.

پاکستان، چې د طالبانو د بیا واک ته رسیدو په پیل کې ځان د کابل فاتح ښوده، اوس د طالبانو پر حکومت د تروریزم د ملاتړ تور پورې کوي.

پاکستان په وروستي یو کال کې پر افغانستان د فشار لپاره افغان کډوال زښت ځورولي، نیولي، بندیان کړي او شاوخوا ۵ لکه یې په زوره ایستلي دي. همداراز یې په ځلونو د مېوو په فصلونو کې د افغان مېوو د صادراتو د مخنیوي لپاره لارې بندې کړي. او همداراز یې د کراچۍ په بندر کې د افغان سوداګرو تجارتي مالونه په میاشتو – میاشتو ایسار کړي، اضافي چارجونه او مالیې یې پرې وضع کړي دي.

د امنیت شورا غونډې ته د ایران استازي بیا وویل چې د افغانستان خلاف اقتصادي بندیزونه دې پای ته ورسیږي.

امیرسعید ایرواني داعش او په القاعده پورې تړلې ډلې د افغانستان او سیمې لپاره ګواښ وبللې.