د افغانستان د کرکټ تر ۱۹ کلونو کشرې لوبډلې د اسیايي جام د سیالیو په لړ کې نن نیپال ته په ۷۳ منډو ماتې ورکړه.
د دې پنځوس اوره سیالۍ په پیل کې افغانستان بیټنګ یا توپ ویشتنه وکړه چې د ټولو لوبغاړو د سوځېدو په پای کې یې سیالې لوبډلې ته ۲۶۲منډې هدف وټاکه.
نیپال ونه توانېد ورکړل شوی هدف پوره کړي.
د افغانستان لپاره تر ټولو ډېرې منډې جمشید ځدراڼ وکړې. ده په ۱۵۲ توپونو ۱۰۶ منډې وکړې او تر پایه ونه سوځېد خو د ستړیا له کبله یا په کوم بل دلیل یې لوبه پرېښوده.
همداراز نعمان شاه ښه بیټنګ وکړ. ده په ۴۰ توپونو ۶۰ منډې وکړې چې ۳ شپږیزې او ۵ څلوریزې پکې شاملې وې.
په باولینګ یا توپ اچونه کې بیا فریدون داوودزي ۳، نصیرخان معروفخېل ۳ او محمد یونس ۲ لوبغاړي وسوځول.
د افغانستان تر نولس کلونو کشرې لوبډلې لومړۍ سیالي پر هند وبایلله. بله مسابقه یې د راروانې سې شنبې په ورځ د پاکستان په وړاندې ده. که د پاکستانه په وړاندې بریا خپله کړي، افغانستان به نیمه پایلوبې ته لار پیدا کړي.