تاند (پنجشنبه، د قوس ۱۶ مه) د اروپايي اتحادیې د کډوالو اداره وايي، د روان میلادي کال په لومړیو ۹ میاشتو کې د دې اتحادیې په غړیو هیوادونو کې ۸۶ زره افغانانو د پناه غوښتنې کړي دي.
دې ادارې همداراز ویلي چې په افغانستان کې له وروستیو تحولاتو وروسته هره میاشت ۱۱ زره افغانان د اروپايي اتحادیې په غړیو هیوادونو کې پناه غواړي.
په دې شمېر کسانو کې هغه افغانان شامل نه دي چې له بریتانیا، سویډن، ناروې او ډنمارک څخه یې پناه غوښتې ده.
د اروپايي اتحادیې د کډوالو د چارو د ادارې په وینا، د اروپايي اتحادیې په غړیو هیوادونو کې افغان دوهم ملت دی چې په دې اتحادیه کې د پناه زیاته غوښتنه کوي.
په هرو درو افغانانو کې یو یې بې سرپرسته ماشومان دي چې د پناه غوښتنه کوي.
په همدې حال کې د ملګروملتو د کډوالو لویه کمیشنري وايي چې لا هم تر ۳ میلیونه زیات افغانان په خپل هیواد کې کډواله دي.
دې کمیشنرۍ پرون په یوه راپور کې وویل چې ۳ میلیونه او ۲۵ زره افغانان کورني بې ځایه شوي او لږترلږه پنځه نیم میلیونه په ګاونډیو هیوادونو کې کډوال دي.