تاند (چهارشنبه، د ثوس ۸ مه) پاکستاني رسنۍ وايي، په بنو کې پر پاکستاني ځواکونو له حملو وروسته د دغه هیواد حکومت د افغانستان له طالب چارواکو غوښتي چې د ټي ټي پي یو مشر حافظ ګل بهادر ونیسی او دوی ته یې وسپاري.

د یکشنبې په ورځ / نوومبر ۲۶/ د بنو – میرانشاه په لویه لاره کې د پاکستاني ملېشه ځواک پر ګزمې انتحاری برید وشو چې په پیل کې پاکستاني چارواکو د برید له کبله د ۱۶ تنو ټپي کېدا تایید کړه خو وروسته یې د مرګ ژوبلو شمېر ډېر وښود.

د ټي ټي پي یوه ویندوی محمد خراساني د دې برید مسوولیت ومانه.

پاکستان ادعا کړې چې بریدګر افغان و ځکه چې دوی ورسره تذکره موندلې ده خو دا یې نه دي ویلي چې د انتحاري تذکره څرنګه روغه پاتې شوې وه.

پاکستان له دې برید وروسته په اسلام اباد کې د افغانستان سفیر احضار کړی او د اعتراض ترڅنګ یې هغه ته ویلي چې د دې برید عاملان ونیسي.

جیونیوز تلویزیون د خپل هیواد د دیپلوماتیکو سرچینو په قول ویلي چې د پاکستان د باندنیو چارو وزارت د طالبانو له سرپرست حکومته غوښتي چې د بنو د برید عاملان په خپله خاوره کې وځپي.

د جیو نیوز پر اساس، د پاکستان د باندنیو چارو وزارت د طالبانو له حکومته دا هم غوښتي چې د ټي ټي پي یو مشر حافظ ګل بهادر ونیسي او پاکستان ته یې وسپاري.

د طالبانو حکومت تراوسه پورې په دې اړه څه نه دي ویلي خو تر دې وړاندې یې د پاکستان دې ته ورته ادعاوې رد کړي او ویلي یې دي چې پاکستان دې خپلې ستونزې په خپله حل کړي.

ځینې طالب سرچینې وايي چې د پاکستان اصلي غوښتنه دا ده چې افغان طالبان دې په کوزه پښتنونخوا کې د ډیورند کرښې په اوږدو کې د ټي ټي پي پر ضد له دوی سره په ګډه عملیات وکړي او له خپلو ارتباطاتو څخه په استفادې دې د ټي ټي پي د مشرانو او قوماندانانو په ځپلو کې له دوی سره مرسته وکړي. خو دا هغه غوښتنه ده چې افغان طالبان یې په هیڅ صورت نه شي منلی.