د سفارت په اعلامیه کې راغلي چې وار له مخه یې د اکتوبر له لومړۍ په هند کې خپل فعالیتونه ځنډولي وو او هیله یې درلوده چې د هند حکومت داسې یو دریځ غوره کړي چې ددوی د فعالیتونو د دوام لپاره اغېزمن تمام شي.

سفارت ویلي چې برعکس په دې وروستیو اتو اونیو کې د کنټرول د پرېښودو لپاره دواړو لوریو هندي حکومت او طالبانو تر فشار لاندې راوستی وو او بلآخره له یوه ستونزمن انتخاب سره مخ شول.

په اعلامیه کې افغان سفارت له هند غوښتي چې د سفارت د سرپرستۍ په برخه کې خپل مسوولیت په غاړه واخلي او ډاډ ورکړي چې د افغانستان د سفارت ټول اموال، موټر او په بانکي حساب کې شاوخوا پنځه لکه ډالره په خوندي توګه ساتل کېږي.

سفارت سپارښتنه کړې چې د افغانستان دری رنګه بېرغ په ودانۍ باندې رپانده پاتې شي.

د هند حکومت او طالبانو سمدستي د سفارت په اعلامیې باندې غبرګون نه دی ښودلی، خو مخکې یې د سفارت د فعالیتونو تر ځنډېدو وروسته ویلي وو چې ځینې افغان قنسولګرۍ به فعاله وي.

یو شمېر شنونکي باور لري چې هندوستان په تدریجي ډول د طالبانو رژیم ته د افغان سفارت د سپارلو تمرین کوي او د جمهوري نظام پر دیپلوماتانو یې فشارونه د همدې لپاره وو.

هندوستان په ښکاره په دې اړه سپینې خبرې نه کوي.

ځینې نور خلک بیا د افغانستان په سفارت کې له جمهوري نظام څخه د ور پاتې دیپلوماتانو خلاف د فساد ادعاوو او خپلمنځیو ناندریو ته ګوته نیسي چې په وینا یې هندوستان یې له دوی څخه مخ اړولو ته اړ وایستی دی.