تاند:( سې شنبه، د عقرب ۱۶مه) د متحده عربي اماراتو په ابوظبۍ ښار کې د افغانستان سفارت له لوري افغانانو ته د پاسپورټونو وېش پیل شو.
د طالبانو د بهرنیو چارو وزارت د ویاند مرستیال حافظ ضیاء احمد تکل وايي له نن وروسته په متحده عربي اماراتو کې مېشت هېوادوال کولای شي چې ابوظبۍ کې د افغانستان سفارت کونسلۍ برخې ته د پاسپورټ د ترلاسه کولو لپاره مراجعه وکړي.
تکل زیاتوي، دوی ژمن دي او هڅې کوې چې د نړۍ په ګوټ ګوټ کې ګرانو هېوادوالو د پاسپورټونو او نور د اړتیا وړ قانوني اسنادو تر څنګ قونسلي خدمات په ښه شکل وړاندې کړي.
له دې وړاندې په ایران، ترکیه، پاکستان، مالیزیا او یو شمېر نورو هېوادونو کې هم د پاسپورټونو وېش پیل شوی و.
دا په داسې حال کې ده، چې په هېواد کې دننه خلک د پاسپورټونو له نه ترلاسه کولو شکایت لري او ادعا کوي، چې په تور بازار کې په زرګونه ډالره بیه ورته ټاکل شوې ده.
طالب چارواکي بیا د فساد ادعاوې بې اساسه بولي.