تاند (یکشنبه، د عقرب ۱۴مه) ایراني چارواکي وايي چې د افغانستان د طالبانو د امنیتي ځواکونو په مرسته یې د اسراییل د بې پېلوټه الوتکو د بریدونو دسیسه ناکامه کړې ده.
د ایران ایرنا خبري اژانس نن د خپل هیواد د چارواکو په قول راپور ورکړ چې د طالبانو په استخببارتي همکارۍ یې درې تنه، چې د افغانستان او ایران ترمنځ له غرونو څخه یې پر ایران د بې پېلوټه الوتکو د انتحاري بریدونو نیت درلود، نیولي دي.
د ایران نړیوال تلویزیوني چاینل هم وویل چې د طالبانو او د ایران د استخباراتو وزارت د ګډو عملیاتو په نتیجه کې د ایران په ختیځ کې د اسراییل د استخباراتي ادارې، موساد د بې پېلوټه الوتکو د برید دسیسه ناکامه شوې ده.
دې چاینل همداراز ویلي چې په دې تړاو درې تنه نیول شوي کسان د ایران د تابعیت اسناد لري.
چاینل همداراز وايي چې دې کسانو د افغانستان له پولې په ایران کې د بې پېلوټه الوتکو د حملو پلان درلود.
د افغانستان د طالبانو حکومت تراوسه پورې په دې اړه څه نه دي ویلي.