تاند (پنجشنبه، د عقرب ۱۱ مه) له افغان کډوالو سره د پاکستان د ناوړه چلند په دوام، امریکا متحدو ایالتونو یو ځل بیا له دغه هېواده وغوښتل، چې د افغان کډوالو په اړه خپلې ژمنې عملي کړي.

د متحدو ایالتونو د بهرنیو چارو وزارت ویاند متیو مېلر په یوه خبري غونډه کې، د پاکستان په ګډون د افغانستان له ګاونډيو هېوادونو غوښتي چې هغو کډوالو ته خپلې خاورې ته د ننوتلو اجازه ورکړي چې د نړۍوال ملاتړ په لټه دي.

نوموړي په یوه خبري ناسته کې وویل:: «موږ له خپلو ټولو شریکانو سره یو ځای، د پاکستان په ګډون له ټولو هېوادونو غواړو چې د افغان کډوالو او پناه غوښتونکو اړوند خپلو ژمنو ته پابند پاتې شي او د کډوالو د بېرته نه ستنولو اصل ته درناوی وکړي. موږ د پاکستان په ګډون د افغانستان له ګاونډیو غواړو چې هغو افغانانو ته اجازه ورکړي چې د دوی خاورې ته ننوځي، کوم چې د نړۍوال ملاتړ په لټه دي او هغوی ته د بشري مرستو د رسولو په لړ کې له نړۍوالو بشري سازمانونو سره همغږي وکړي.»

دا په داسې حال کې ده، چې له پاکستان څخه په پرله پسې ډول افغان کډوالو سره د پاکستان د ناوړه چلند د دوام خبرونه ورکړل شوي.

تازه راپورونه ښيي، چې دغه هېواد زرګونه افغان کډوال نن بندیان کړي او ځینې یې بیرته په پیسو خوشې کړي.

په شکایت کوونکو کې هغه کډوال هم شامل دي، چې وایي د متحدو ایالتونو د پنا غوښتنې قضیې او هغه اسناد هم لري، چې امریکا ورکړي او ډاډ یې ورکړی چې پاکستان به مزاحمت نه ورته کوي.