تاند (پنجشنبه، د عقرب ۱۱ مه) کابل ښاروالۍ په کابل ښار کې د هوا د ککړتیا د کمولو او مخنیوي په موخه، ټولو ښاریانو په ځانګړې توګه د لوړو پوړیزو ودانیو، د دولتي او غير دولتي ودانيو، حمامونو، د لامبو حوضونو، رستورانتونو، او د هوټلونو مالکانو او نورو اصنافو ته خبر ورکړی چې د مرکز ګرمۍ او د تودوخې په نورو سیستمونو کې د لوګي د تصفیې د فلټر نصبول اړین دي.
دغې ادارې ویلي، چې د مرکزګرمۍ او د تودوخې په نورو سیستمونو کې د لوګي د تصفیې فلټر د نصب او فعالیت له څرنګوالي څخه څارنه کیږي او چاپیریالي سرغړونکي به له قانوني چلند سره مخ شي.
سرچینې نه دي ویلي، چې په مشخص ډول به سرغړونکو کسانو سره څه ډول چلند وشي.
تېر کال کابل ښاروالۍ یو شمېر خلک د لوګي ضد فلتر د نه نصبولو له امله نقدي جریمه او د څه وخت لپاره یې کاروباري ځایونه تړلي وو.