تاند:( یکشنبه، د عقرب ۷ مه) د ننګرهار د خوږیاڼو لپاره د طالبانو نوي ګومارل شوي ولسوال سید نور سنګري، د معرفۍ په غونډه کې د زړه په سکتې ساه ورکړه.
د راپورونو له مخې، د سیدنور سنګري زړه هغه مهال سکته وکړه، چې د خپلې معرفۍ په غونډه کې یې وینا کوله.
ویل شوي، چې ده وروسته په روغتون کې ساه پرې کړه.
سیدنور سنګري، چې تر دې مخکې د ننګرهار ولایت د شینوارو ولسوال و، تازه د خوږیاڼو ولسوال ګومارل شوی و.
طالب چارواکو ویلي چې سیدنور د زړه ناروغي لرله.
د سنګري د عمر په اړه څه نه دي ویل شوي. خو له عکسه یې داسې ښکاري چې لا ځوان و.
په افغانستان ډېر کسان د روغتیايي معلوماتو د نه لرلو اویا بې پروایۍ له کبله په داسې ناروغیو مري چې په اسانه یې درملنه کېدای شي.