تاند:( یکشنبه، د عقرب ۷ مه) د نورستان په دواب ولسوالۍ کې د جمهوري نظام د یوه امنیتي مقام د وژل کیدو په اړه بېلابېلې ادعاوې شوي.
په نورستان کې طالب چارواکو په یوه خپره کړې خبرپاڼه کې دعوه کړې چې تېر مازیګر د دوي استخباراتو د دواب ولسوالۍ په بجګل دره کې پوځي عملیات کړې او پکې يي دمحب الله په نوم مقاومت جبهې پورې تړلی قومندان وژلی دی.
خو د سیمې اوسیدونکي بیا وایي: چې محب الله په جمهوریت کې د محلې پولیسو قومندان و او اوس يي هیچا سره اړیکې نه درلودې.
ځایي سرچینو ویلي، د طالبانو په ډزو کې د محب الله بل ملګری هم وژل شوی او دوه ماشومان ټپیان شوي دي.
د طالبانو مخالفې وسله والې ډلې ملي مقاومت جبهې بیا ادعا کړې، چې محب الله د دوی قومندان و او پر کور یې د شویو عملیاتو پر مهال ۶ طالبان وژل شوي او ۱۵ نور له دغې ډلې سره ملګري شوي دي.
طالبانو بیا دا ادعا رد کړې ده.
طالبانو د جمهوري نظام د دغه امنیتي مقام د وژلو او مقاومت ډلې سره یې د تړاو خبره داسې مهال کړې، چې ډېر ځله د دوی خلاف د جنګي ډلو د موجودیت ادعاوې بې اساسه بولي.
یو شمېر خلک بیا باور لري، چې طالبان لا هم د جمهوري نظام د منسوبینو خلاف غچ اخیستونکي بریدونه کوي او مقاومت ډله دوی سره د وژل شویو کسانو د تړاو د ادعاوو له تاییدولو سره نورو پخوانیو امنیتي منسوبینو ته خطر پېښوي.