تاند(چهارشنبه، د میزان ۳مه) د قمرخیریه بنسټ مسوولین وايي چې د هرات ولایت د زنده جان ولسوالۍ په سربلند کلي کې د ۵۰ کورونو د جوړولو چارې پیل کړې دي.
د دغه بنسټ مرستيال احسان الله وايي، چې تر دې وړاندې يې د دغه ولایت په زلزله ځپلو سیمو کې پر زیانمنو کسانو خوراکي توکي، جامې او خیمې وېشلې دي.
په همدې حال کې د هرات د اطلاعاتو او کلتور لپاره د طالبانو رئیس او له زلزله ځپلو سره د مرستې د کمېسيون وياند مولوي احمدالله متقي وايي، هڅې روانې دي چې ژر تر ژره د پاتې کورونو د جوړولو عملي چارې پيل شي.
نوموړی دغه راز ټینګار کوي چې د استوګنې کورونه دې په پاخه او اساسي توګه جوړ شي او دوی به د دغو کورونو د جوړولو له بهیر څخه څارنه کوي.
څو ورځې مخکې هم د یاد ولایت د زنده جان ولسوالۍ په یوشمېر کلیو کې د استوګنې کورونو د جوړولو چارې په عملي توګه پیل شوې وې، چې اوس هم دوام لري.
د راپورونو له مخې، د هرات وروستیو زلزلو زرګونه کورونه ویجاړ کړي.
طالب چارواکو ژمنه کړې چې عادي ژوند ته د زلزله ځپلو تر ستنیدو به هغوی سره مرستو ته دوام ورکوي.
زلزله ځپلي بیا دوی ته اعلان شوې مرستې د قناعت وړ نه بولي او وایي تراوسه ډېره ناڅیزه همکاري ورسره شوې او اندېښمن دي چې په را نږدې ژمي کې به څه برخلیک سره مخامخ کیږي.