تاند (پنجشنبه، د میزان ۲۷مه) یوې نسبتاً شدیدې زلزلې نن سهار یو وار بیا هرات ولایت او شاوخوا سیمو ته ټکان وکړ.
د امریکا د جیالوجیکي سروې د راپور له مخې، د دې زلزلې شدت د ریښتر په حساب ۴ اعشاریه ۱ درجې و چې د څو مخکینیو زلزلو پرتله کم و.
د دې زلزلې مرکز د هرات ښار د شمال لوېدیڅځ په څو کیلومترۍ کې تر مځکې ۱۰ کیلومتره لاندې بلل شوی دی.
تراوسه پورې د زلزلې له کبله د تاوانونو په اړه څه نه دي ویل شوي.
په همدې منځ کې د ملګروملتو د بشري مرستو د تنظیم اداره، اوچا وايي چې د هرات په ۶ زلزله ځپلیو ولسوالیو کې نژدې ۶۶ زره تنه په مستقیم ډول له زلزلو اغېزمن شوي دي.
مخکې دې ادارې ۳۴ زره تنه اغېزمن بللي وو.
د اوچا د معلوماتو پر اساسا ۲۸۹ کلي، چې اکثره یې په بشپړ ډول ویجاړ شوي، شدید اغېزمن شوي دي.
د دې اوونۍ د یکشنبې د ورځې زلزلې شاوخوا ۳۰ کلي وران کړل. ډېر نور لومړۍ زلزلې ویجاړ کړل چې تر دې یوه اوونۍ وړاندې شوې وه.
په همدې حال کې د طالبانو حکومت اعلان کړی چې د هرات د زلزله ځپلو لپاره نوي پاخه کورونه جوړوي.