تاند:( سې شنبه، د میزان ۲۵مه) د روسیې د بهرنیو چارو وزارت ویاندې ماریا زاخارووا د طالبانو له چارواکو وغوښتل چې د بغلان په پلخمري کې د شیعه ګانو پر یوه جومات د تېرې جمعې ورځې د چاودنې عاملان پيدا او مجازات کړي.
نوموړې د دغه برید د غندلو تر څنګ د قربانیانو له کورنیو سره غمرازي هم کړې ده.
روسۍ ویاندې دا پېښه د افغانستان د بې ثباته کولو او پکې د تفرقه جوړولو هڅه ګڼلې ده.
د طالبانو چارواکو په دغه پېښه کې د ۷ تنو د وژل کیدو او ۱۲ نورو د ټپي کیدو خبر ورکړی و.
د چاودنې مسوولیت داعش ډلې منلی و.
روسیې، ایران او په سیمه کې د امریکا یو شمېر مخالف هېوادونه په مختلفو بڼو هڅه کوي چې د داسې پېښو عامل امریکا متحده ایالات وښیي خو طالب چارواکو دا ډول توجیهات رد کړي او ویلي چې په افغانستان کې داعش ډله د پياوړتیا چانس نه لري.
طالب ویاند ذبیح الله مجاهد په ورته مهال، ویلي دوی نه پریږدي چې افغانستان د هېوادونو د نیابتي سیالۍ په میدان مرکز بدل شي.
د مجاهد اشاره له دې خبرو د ایران د استازي حسن کاظمي قمي هغو خبرو ته غبرګون و چې امریکا یې په افغانستان کې د داعش ډلې د پياوړتیا په هڅو تورنه کړې وه.