تاند:(دوشنبه، د میزان ۲۴مه) د افغانستان لپاره د امریکا متحده ایالاتو ځانګړي استازي ټام ویسټ د بغلان په پلخمري ښار کې د جمعې ورځې هغه برید غندلی، چې د افغان شیعه مذهبو پر یوه جومات ترسره شو.

ویسټ پر خپلې ایکس پاڼې لیکلي چې افغان شیعه ګان د تاوتریخجن افراطیت له امله ډېر زیانونه ګاللي دي.

هغه یاد شوی برید ترهګریز عمل ګڼلی او د قربانیانو له کورنیو سره یې غمرازي څرګنده کړې ده.

د طالبانو ځایي چارواکو په دغه برید کې د ۷ تنو د وژل کیدو او ۱۲ نورو د ټپي کیدو خبر ورکړی و.

د دغه برید مسوولیت داعش ډلې پر غاړه اخیستی.

دا په داسې حال کې ده چې د ایران په ګډون په سیمه کې د امریکا یو شمېر مخالف هېوادونه په ښکاره او کنایه، د داعش ډلې تر شا د امریکا د ملاتړ ادعاوې کوي، خو د طالبانو حکومت په دې اړه شوې ادعاوې نه دي تایید کړي.

د طالبانو د رژیم ویاند ذبیح الله مجاهد څو ورځې مخکې د ایران د سفیر حسن کاظمي قمي هغو څرګندونو ته په ْضمني توګه د رد ځواب ورکړ، چې ویلي یې وو: امریکا په افغانستان کې د داعش د پياوړي کولو په هڅه کې ده.

مجاهد ادعا کړې وه چې داعش ډله دوی ځپلې او د پياوړتیا هڅې یې نه دي لیدل کیږي.

هغه د دې ترڅنګ ټینګار کړی و چې افغانستان به د هېوادونو د سیالۍ په میدان بدلیدو ته پرې نه ږدي.

له دې سره، یو شمېر افغان شنونکي په افغانستان کې د مشخصو قومي، سمتي او مذهبي ادرسونو په اړه د بهرنیو هېوادونو او دیپلوماتانو څرګندونې مغرضانه بولي او وایي د داسې څرګندونو تر شا منفي نیتونه موجود دي.