تاند (دوشنبه، د میزان ۱۷مه) د افغانستان لپاره د روسیې ځانګړي استازي ضمیر کابلوف د کابل له واکمنو چارواکو د ګیلې په ډول ویلي، چې د هرات زلزله ځپلو سره یې د مرستې غوښتنه ورڅخه نه ده کړې.
نوموړي ویلی، چې که د مرستې غوښتنه ورڅخه وشي، هېواد به یې د مرستو د ترسره کیدو په اړه پریکړه او بحث وکړي.
دا څرګندونې په داسې مهال دي، چې له تېرو دوو ورځو راهیسې د افغانستان په لویدیځ کې د دغې ویجاړوونکې او کم سارې وژونکې زلزلې خبرونه د نړیوالو رسنیو سرټکي ګرځیدلي دي.
یو شمېر افغانان له زلزله ځپلو سره په مرسته رسولو کې د واکمن رژیم د بې تدبیرۍ د ادعا ترڅنګ نړیوال هم ګرموي، چې د افغانانو له داسې ناورین سره یې سلیقوي او سیاسي چلند کړی او تر اوسه یې لا تر خاورو لاندې ایسارو مړو او ژوندیو انسانانو د ویستو لپاره لازم اقدامات نه دي کړي
د ملګروملتو د بشري مرستو د همږغۍ اداره، اوچا وايي چې د هرات په زلزله کې ۱۰۲۳ تنه مړه شوي دي.
خو نور راپورونه ښيي چې لږترلږه ۲۵۰۰ تنه مړه شوي دي.
تر دې دمه د ملګروملتو د بشري مرستو د همږغۍ ادارې، اوچا د افغانستان لپاره د بخپلو شري مرستو له بیړنۍ زېرمې څخه ۵ میلیون ډالره د هرات زلزله ځپلیو ته ځانګړي کړي دي.
اوچا ویلي چې په ۲۴ ساعتونو کې به د خپلو شریکانو په مشوره د مرستو راټولولو پروسه پیل کړي.
پاکستان، ایران او چین د خوراکي موادو، کمپلو، درملو او خیمو د لېږلو ژمنه کړې ده.
د پاکستان صدراعظم انوارالحق ویلي چې کابل ورڅخه د درملو، ګرځنده روغتونونو او کمپلو غوښتنه کړې ده او دوی به دا مواد نن ماسپښین ولېږي.
د ایران د بهرنیو چارو وزیر امیرعبدالهیان هم د بشري مرستو د لېږلو ژمنه کړې ده.
پرون ایراني رسنیو وویل چې یو شمېر خیمې، کمپلې، درمل او نور وسایل یې هرات ته استولي دي.
د چین سره میاشت ټولنې د ۲ لکه ډالرو مرستې ژمنه کړې او ویلي یې دي چې دا پیسې به افغاني سره میاشت ټولنې ته وسپاري.
د ترکیې د باندنیو چارو وزارت ویلي چې د ویجاړو شویو سیمو په بیارغونه کې مرسته کوي.
د امریکا د بهرنیو چارو وزیر انتوني بلینکن ویلي چې هیواد یې د هرات وضعیت څاري. او د دوی همکارې مرستندویې موسسې هڅه کوي چې مرستې ورسوي.
ده نه دي ویلي چې امریکا به څومره مرسته وکړي.
په همدې حال کې د طالبانو د حکومت د رسنیو د مرکز مشر مولوي نعیم الحق حقاني د زلزله ځپلو سیمو د کتنې په ترڅ کې پر مرستندویو موسسو انتقاد وکړ، ویې ویل:«بهرنۍ مرستندویې موسسې چې تل د ښځو او ماشومانو د حقونو د دفاع ادعا کوي، اوس چیري دي؟»
ده وویل چې د هرات په زلزله کې تر ټولو ډېرې ښځې او ماشومان مړه شوي دي.
د ملګروملتو د بشري مرستو د همږغۍ ادارې، اوچا په وینا، زلزلې پههرات ولایت کې ۱۱۵۸۵ تنه یا ۱۶۵۵ کورنۍ اغېزمن کړي دي.