تاند (دوشنبه، د میزان ۱۷ مه) د ملګروملتو د بشري مرستو د همږغۍ اداره، اوچا وايي چې د هرات په زلزله کې ۱۰۲۳ تنه مړه شوي دي.
خو د وروستیو معلوماتو له مخې، په دې زلزله کې لږترلږه ۲۵۰۰ تنه مړه شوي دي.
د اوچا پر اساس، د زلزلې په قربانیانو کې ۵۱۶ تنه بې درکه دي، یعني مړي یې لا موندل شوي نه دي او ۱۶۶۳ تنه ژوبل شوي دي.
د دې ادارې پر اساس دې زلزلې ۱۱۵۸۵ تنه یا ۱۶۵۵ کورنۍ اغېزمن کړي دي.
اکثره ټپیان د هرات ښار په حوزوي روغتون کې بشتر شوي دي.
په دغه روغتون کې حاضردمه ۵۵۲ تنه زلزله ځپلي تر درملنې لاندې دي چې د هغو په منځ کې ۱۹۹ ښځې، ۴۳ ماشومان او ۸۱ نارینه دي.
د شنبې په ورځ هرات او شاوخوا ولایتونه شدیدې زلزلې چې شدت یې د ریښتر په کچه ۶ اعشاریه ۲ درجې و، ولړزول. په دې زلزلې پسې، چې مرکز یې له هرات ښاره ۴۰ کیلومتره لېرې په زنده جان ولسوالۍ کې و، لږترلږه ۵ نورې زلزلې وشوې.
تر ټولو ډېره مرګ ژوبله او تاوانونه په زنده جان ولسوالۍ کې پېښ شوي دي.