تاند (شنبه، د میزان ۱۵ مه) راپورونه وایي، چې په هرات ولایت کې د نن سهار د زلزلې له امله د تلفاتو شمېر زیات شوی.
تازه راپورونه څرګندوي، چې د دغې زلزلې له امله ۳۰ تنه مړه شوي او لږترلږه ۳۰۰ نور ټپیان دي.
تر دې مخکې په هرات کې د طالبانو دعامې روغتیا رئیس مولوي طالب رسنیو ته د ۱۴ تنو مړینه تایید کړې وه خو شېبه په شېبه له لیرې پرتو سیمو راپورونه رسیږي چې ورسره د مرګ ژوبلو شمېر هم ډېریږي.
د هرات د والي ویندوی وايي چې ممکن ۱۰۰ تنه مړه شوي وي.
یوې نسبتاً شدیدې زلزلې نن هرات ولایت او شاوخوا سیمې ولړزولې.
د جرمني د زلزله پېژندنې ادارې پر اساس د دې زلزلې شدت، چې د افغانستان په وخت په یوولس بجې او ۱۲ دقیقې وشوه، شپږ نیم ریښتره و.
د دې ادارې د معلوماتو له مخې، د زلزلې مرکز له مځکې ۱۰ کیلومتره لاندې و چې ډېر ژور نه دی او عموماً د هغو زلزلو شدت او په نتیجه کې یې زیان زیات وي چې مرکز یې ډېر ژور نه وي.
لویدیځو رسنیو ویلي چئ د زلزلې مرکز د هرات ښار د شمال ختیځ په ۴۰ کیلومترۍ کې و.
د امریکا د جیالوجیکي سروې د زلزلې شدت ۶ اعشاریه ۲ ښوولی دی.
وېره ده چې د مرګ ژوبلو شمېر به تر دې ډېر وي.