تاند:( پنجشنبه، د میزان ۱۳ مه) د طالبانو چارواکي وایي، چې د دوی له بیا واکمنیدو سره د هلمند ولایت د لویو لارو په اوږدو کې ۱۳ جوماتونه جوړ شوي دي.
د طالبانو تر واک لاندې باختر اژانس لیکلي، چې په دغو جوماتونو کې نارینه او ښځینه ټولو ته د جلا لمانځه او اوداسه اسانتیاوې برابرې شوې دي.
سرچینې نه دي ویلي، چې دا جوماتونه د طالبانو ادارې که دغې ادارې پر ځایي خلکو جوړ کړي دي.
د طالبانو د اطلاعاتو او فرهنګ رئیس ویلي، چې په دغه ولایت کې پر لویو لارو د جوماتونو نشتوالی یوه جدي ستونزه وه.
دا په داسې حال کې ده، چې یو شمېر خلک طالبان د لومړیتوبونو په نه پېژندلو تورنوي او وایي افغانستان لا له پخوا پریمانه جوماتونه لرل، خو طالبانو د دې لپاره چې پرځیدلی جمهوري نظام دین ته په نه پاملرنې تورن وښيي او خپل رژیم په دې اړه پیاوړی وښيي، د زیاتو جوماتونو د جوړولو لپاره پر خلکو فشار راوړي.