تاند (چهارشنبه، د میزان ۱۲ مه) د چین په هانګژو کې په اسیايي سیالیو کې د افغانستان د کرکټ لوبډلې د دغو لوبو د تېرې دورې اتلې سریلانکا ته ماتې ورکړه.
سریلانکا ته په دې شل اوره سیالۍ کې د ۸ منډو په توپیر دې ماتې د افغانستان لوبډله نیمه پایلوبې ته ورسوله.
ټاکل شوې ده چې د افغانستان ټیم په نیمه پایلوبه کې له پاکستان سره مخامخ شي.
په نننۍ مسابقه کې د افغانستان لپاره نورعلي پنځوسیزه پوره کړه او د ده پنځوسیزې مرسته وکړه چې سریلانکا ته ۱۱۶ منډې هدف وټاکي.
د سریلانکا ټول لوبغاړي په داسې حال کې وسوځېدل چې ۱۰۸ منډې یې کړې وې چې ټیټ هدف و.
د افغان لوبډلې کیپتان د دغه هدف په اړه رسنیو ته وویل« موږ ښه هدف و نه ټاکه، مګر په فیلډنګ کې هلکان وځلېدل او خپل توان یې نندارې ته وړاندې کړ.»
قیس احمد ۳ او د افغان لوبډلې کیپتان ګلبدین نایب هم ۳ لوبغاړي وسوځول.
که څه هم د ملي لوبډلې نامتو لوبغاړي لکه راشدخان، مجیب الرحمان، محمد نبي او فاروقي د افغانستان د اسیايي سیالیو په لوبډله کې شامل نه دي خو شهزاد محمدي، چې یو وخت د ملي لوبډلې تکړه توپ وهونکی و، په دې ټیم کې شامل دی.