تاند:( دوشنبه، د میزان لسمه) په کابل کې د ایران د سفارت مرستیال حسین مرتضوي د طالبانو له رژیم څخه غوښتي، چې ایران ته په ناقانونه توګه د افغانانو د ورتلو د بهیر مخه ونیسي.
د ایران سفارت وایي، چې مرستیال یې دا غوښتنه د طالبانو د کورنیو چارو وزارت له لومړي مرستیال محمد نبي عمري څخه د لیدنې پر مهال کړې ده.
سرچینه زیاتوي، چې د دې ترڅنګ ایران ته د نورو ناقانونه شیانو د ورتلو د مخنیوي غوښتنه هم شوې ده.
د ایران سفارت د طالب مقام له قوله ویلي، چې امریکا او ځینې لویدیز هېوادونه د ایران او طالبانو د اړیکو خرابولو هڅه کوي، خو دوی یې د مخنیوي لارې ګوري.
د طالبانو له بیا واکمنیدو سره، نږدې هره ورځ ایران ته د زرګونه افغانانو د ناقانونه ورتګ او له هغې لارې ترکیې او اروپایي هېوادونو ته د تلو د هڅو راپورونه ورکول کیږي.
په دې ترڅ کې افغانانو سره د ایراني او ترکي ځواکونو د ناوړه چلند ادعاوې هم شته، خو طالب چارواکي یې په اړه څه نه وایي.
د طالبانو په بیا واکمنیدو او د نورو بدلونونو ترڅنګ د بشري او اقتصادي ستونزو له امله، میلیونونه افغانان هېواد پرېښودو ته اړ شوي دي.