تاند:( دوشنبه، د میزان لسمه) راپورونه وایي، چې ترکیې د افغانستان په سفارت کې د طالبانو د رژیم له لوري د یوه نوي دیپلومات معرفي کیدل منلي.
دغه معرفي شوی کس محمد زبیر ودان نومیږي، چې ویل کیږي د افغان سفارت د لومړي سکرتر په توګه ټاکل شوی او د سفارت اقتصادي چارې به مخته وړي.
د هغه په تړاو نور جزییات نه دي ورکړل شوي او نه هم د ترکیې حکومت او د طالبانو رژیم په دې اړه څه ویلي دي.
تر دې مخکې، د ترکیې حکومت په استانبول کې د افغانستان کونسلګري د طالبانو رژیم ته سپارلې وه.
یو شمېر نورو هېوادونو هم د طالبانو له لوري معرفي شوي دیپلوماتان منلي او د افغانستان سفارتي ادارې یې ور سپارلي، خو تراوسه هېڅ هېواد د طالبانو رژیم په رسمیت نه دی پېژندلی.