تاند (جمعه، د میزان ۶ مه) د ملګرو ملتونو سازمان د عمومي منشي مرستیالې آمنه محمد د افغان ښځو وضعیت ورځ تر بلې د خرابیدو پر مخ روان بللی.
نوموړې په یوه خبري ناسته کې ویلي، چې د دغه وضعیت په مناسبت به «په اسلام کې د ښځو رول» په نوم یوه ځانګړې غونده جوړه کړي.
هغې د دغې غونډې د جوړیدو د وخت، ځای او نورو جزییاتو په اړه څه نه دي ویلي.
آمنه محمد، چې مسلمانه ده، د طالبانو د بیا ځلي واکمنۍ په لومړیو وختونو کې یې کابل او کندهار ته د سفرونو بر مهال هڅه وکړه، چې د طالبانو عمومي مشر ملا هبت الله وویني او د نجونو د زده کړو په ګډون د ښځو پر وړاندې د دوی د افراطي پریکړو په بیرته اخیستو یې قانع کړي.
طالبانو بیا د ښځو پر وړاندې د چلند په ګډون له خپلو ګڼو دریځونو بیا- بیا دفاع کړې او ویلي، چې دوی د اسلام په رڼا کې د ښځو حقونه ورکړي او د نجونو زده کړو ته به د شرایطو له مساعدیدو سره اجازه ورکړي.