تاند(دوشنبه، د میزان ۳ مه) نن د افغانستان په ۳۳ ولایتونو کې د ماشومانو د ګوزڼ یا پولیو پر ضد د واکسین پروګرام پیلیږي.
د افغانستان په ۳۴ ولایتونو کې یوازې اروزګان په ننني کمپاین کې شامل نه دی. د عامې روغتیا وزارت او د ملګروملتو چارواکو نه دي ویلي چې اروزګان ولې له دې کمپیانه، چې نن بیلیږي، ایستل شوی دی.
د پولیو فري افغانستان (Polio Free Afghanistan) یا له ګوزڼ څخه خلاص افغانستان په نوم ادارې پرون یکشنبې په خپله ویبپاڼه کې د پولیو د واکسین د کمپاین د پیلیدو د خبر ترڅنګ له افغان کورنیو غوښتنه وکړه چې خپل ټول له پنځوکلونو کشر ماشومان د ګوزڼ په وړاندې واکسین کړي.
په افغانستان کې د ګوزڼ پر ضد واکسیسناسیون داسې مهال پیلیږي چې سږ کال په افغانستان کې د پولیو یا ګوزڼ پنځه مثبتې پېښې ثبت شوي دي.
دا پېښې د ننګرهار ولایت په پنځو ولسوالیو
بټي کوټ، کوټ، نازیان، بهسود او دوربابا کې ثبت شوې دي.
په ننګرهارکې د پولیو د پرله پسې مثبتو پیښو له ثبتیدو سره خبرداری ورکړی شوی و چې ښایي دغه وایروس په چټکه نورو ولایتونو ته هم خبور شي.
افغانستان او پاکستان په نړۍ کې یوازیني دوه هیوادونه دي چې تراوسه پکې د پولیو وایروس د ماشومانو ژوند ګواښي.
د روغتیا پالانو په وینا پوليو يوه ويروسي ناروغي ده چې درملنه نه لري او يوازې واکسين ماشومان له دې ناروغۍ ژغرولی شي.